Proclamatie Prins Sten 1
Ranzel, 6 januari 2024
Ich, Sten Rompen, bie de gratie van de Wuif, Prins van d’r Lubosh tot d’r Moasj, van de Koule tot aan gen Beukelskoel, van ’t Ransdalerveld tot Termaar, maak aan uch ’t volgende bekind.
Punt 1:
Ich Sten Rompen, bin geboare in 1993 en hub ’t grootste deil van mien leave gewoond bie de pap en de mam aan de Spoorstroat 28. Samen mit mien breurs hub ich doa good d'r boel op sjtelte gezat.
Punt 2:
op mien 23ste ging ich als litste van de drie ut nest verloate en ging wonen op Termaar. Sinds 2 joar woon ich samen mit mien leef vrundin Clair in ein gezellig huuske in Partij. Mer woon mit mien hart nog ummer in Ranzel.
Punt 3:
Ich hub ut Clair euvertuigd om de verhoesdoezen wir van d'r zulder te hoale. v'r zunt dan oug hel opzeuk noa os dreumhoes in ut toch zoe sjoene Ranzel.
Aan uch de taak om ut Clair dus neet op anger gedachte te bringe.
Punt 4:
Ich bin mien ganse leave al unne echte horeca tijger, zowel veur als achter de bar.
Noa de horeca opleiding hub ich 6 joar mit veul plezeer gewirkt bie De Leuf in Ubachsberg.
Sinds 2 joar wirk ich bie ut Gulpener Brouwlokaal in Gulpen, hie moag ich mich d'r ganse daag bezighouwe mit beer en eate. Loat dat net miene favoriete hobby zeen.
Punt 5:
Woa ut ooit begos mit de Funkelaere, de Boellies en de Sjoemelare, hub ich gans get joare samen mit mien vrung de carnaval gevierd als lid van ZV Ummer Sjerp. Vergaderingen bie d'r thei, wagens boewe bie d'r Zef en tijdens de carnaval ut durp op d'r kop zitten mit de passende klanken oet os toch zo bescheiden muziek installatie.
Punt 6:
Vanaf 2019 loup ich samen mit mien muziekvrung van de Valsje Loef veur op in d'r optocht va Ranzel. Samen mak v'r veul sjpass mit os activiteiten binne en boete ut durp.
Ich houp dan oug om samen mit mien vrung van de Valsje Loef d'r ein onvergetelijk muzikaal carnavals seizoen van te maken.
Punt 7:
Op d'r Moandig oavend speel ich op de tuba bie de Fanfare Les Amis Reunis van Ranzel.
Soms ein minuut of 5 te laat mer ich blief ter compensatie waal ummer als litste hangen bie de noabespreking.
Punt 8:
Miene passie veur bloasmuziek kin ich tegenwoordig oug kwiet bie de Ransdorfmusikanten.
Als Benjamin van d'r groep hoal ich der gemiddelde leaftied waal drastisch omlieg, houpelijk geldt dat neet veur de kwaliteit van d'r muziek.
Punt 9:
In mien jong joare hub ich gevoetbald bie de jeugd van SCKR en later bie ut 3de van VV Hellas. Aangezien mien kwaliteiten meer tot zien recht komen bie ut kieke van d'r sport hub ich de voetbalsjeun un aantal joar geleeje aan de wilge gehangen.
Punt 10:
Ut is 11 joar geleeje dat d'r iersjte Ranstaler prins mocht weure van De Wuif. Noe 11 joar later maak ich ut kwartet van Ranstalerprinsen compleet. Ich houp dan oug dat ich de komende joare samen mit mien vrung muziek moag maken durg Ranzel en veur Ranzel.
Punt 11:
Dat ich prins moag weure van Ranzel is eine lang gekoesterde dreum dea oetkump.
Samen mit uch, alle luuj van Ranzel, groet of klein, oud of jonk houp ich ein fantastisch carnavalsseizoen te moage beleave. Proost op Ranzel, Proost veur de sjpass, mer boave alles, Proost samen! Mit veul sjpass en plezeer op de Ranzelse maneer!
