Proclamatie Prins Chris 1 & Prinses Rianne

Ranzel 4 januari 2020

Samen: Veer, Chris Meertens en Rianne Jeurissen, bie de gratie van de Wuif, Prins en Prinses van d’r Lubosch tot d’r Moasj, van de Koule tot aan gen Beukelskoel, van ’t Ransdalerveld tot Termaar, maken aan uch ’t volgende bekind;

Punt 1:

Ich Chris Meertens, bin geboaren in 1992 en woon al mien ganze leave in Ranzel. Ich hub doarum al aardig get door ’t Wouveriek gepatrouilleerd um te snappen wie ’t d’r hiej aan toe geit.

Punt 2:

Ich Rianne Jeurissen, bin geboaren in 1991 en ’t grootste deil van mien leave opgegreuid in Klumme (ederein kint zich vergissen) mer in hart en neeren inne echte Wouf!

Punt 3:

Chris: In ’t dagelijks leave bin ich leraar Chemie bie ut Vista College in Sittard. Inne bekende hat ins gezag: Unne leraar weurd geboaren, kriet vakantie en hat dus genog tied om Prins van de Wuif te wearen.

Punt 4:

Rianne: Ich bin in ’t dagelijks leave werkzaam bie Hair en Beauty in Zumpelveld, woa ich al bienoa 10 joar mit veul plezeer werk en al menig kupkes hoar verzurgd hub.

Punt 5:

Chris: Aangezien mien ganse familie al Prins of Prinses is geweas, kos ’t natuurlijk neet oetblieve dat ich ’t aug ein kier zou wearen. Dit joar is ’t dan aug dubbel op in de familie, dus aug 2 keer zo hel fieësten!

Punt 6:

Rianne: Carnaval vieren zit mich al van kleins af aan in ’t blood mit d’r pap dea mich gelierd hat dat d’r mer EIN plek is woa se carnaval viers en dat is i Ranzel!

Punt 7:

Chris: Ich bin al 10 joar lid van Zv Ummer Sjerp, ich goan d’r dan auch vanoet dat aug dit joar, veur d’r Prinsewagen, d’r wagen wir flink door de vering moag goan en een lekker beatje moag klinken.

Punt 8:

Rianne: Noa joarenlank gecarnavald te hubben mit de Breuzelaere werd het dit joar tied veur ’n andere invulling van de carnaval. Es Prinses van de Wuif goan ich mich dan aug zeker neat vervealen! (sorry Monique)

Punt 9:

Chris: In ozze vrieje tied hauten veer de kinger van Ranzel creatief bezig biej de Jeugdvereniging, of zeen v’r bezig om de beerkes d’r aaf te sjporten die v’r in ’t weekend drinken mit de vrung. De kommende tied weuren dat dus meer push- ups!

Punt 10:

Rianne: Es v’r neet aan het werk zeen maken veer aug geer verre reizen, mer veurleupig zeen dat allein mer reisjes mit d’r taxi van de Wuif!

Punt 11:

Chris: Genog gebazeld, veer goan d’r saame mit uch een onvergetelijk carnavalsfiëske van maken en hoape dan auch ederein veelvuldig te moage treffen, jonk oud groët of klein; gaas d’r op en neet meer sjtop.

Samen: Mit veul sjpass en plezeer op de Ranzelse maneer!